धक्कादायक! मुंबईत आमदार कार्यकर्त्याच्या वडिलांचा मृत्यू; रुग्णवाहिकेला झाला उशीर?

Mumbai News : मुंबईतील आकाशवाणी आमदार निवासात आज एका धक्कादायक घटनेत आमदार विजय देशमुख यांचा कार्यकर्ता विशाल धोत्रे यांच्या वडिलांचा मृत्यू झाला. या घटनेमुळे आमदार निवासात खळबळ उडाली असून योग्य वेळेत रुग्णवाहिका न मिळाल्याने हा मृत्यू झाल्याची प्राथमिक माहिती समोर आली आहे. या घटनेने प्रशासनाच्या कार्यक्षमतेवर पुन्हा एकदा प्रश्नचिन्ह उपस्थित झाले आहे.

विशाल धोत्रे हे आपल्या वडिलांसह एका बैठकीसाठी आमदार विजय देशमुख यांच्यासोबत मुंबईत आले होते. आज सकाळी आकाशवाणी आमदार निवासात असताना विशाल यांच्या वडिलांची अचानक तब्येत बिघडली. त्यांना तातडीने रुग्णालयात हलवण्यासाठी रुग्णवाहिकेची मागणी करण्यात आली, परंतु रुग्णवाहिका वेळेत उपलब्ध होऊ शकली नाही. परिणामी, त्यांना उपचार मिळण्यास उशीर झाला आणि त्यांचा मृत्यू झाला. या घटनेची माहिती मिळताच आमदार देशमुख आणि इतर कार्यकर्ते घटनास्थळी दाखल झाले.

“तो फोन आला अन् पुढे..”आयुक्त मनोहरेंच्या नातेवाईकांचा दावा; पोलिसांच्या पंचनाम्यात काय?

प्रत्यक्षदर्शींनी सांगितले की, रुग्णवाहिकेसाठी अनेक फोन केले गेले, परंतु प्रतिसाद मिळाला नाही. या घटनेमुळे कार्यकर्त्यांमध्ये संताप व्यक्त होत असून, प्रशासनाच्या निष्काळजीपणावर टीका होत आहे. आमदार विजय देशमुख यांनी या प्रकरणाची चौकशी करण्याची मागणी केली आहे. “ही अत्यंत दुर्दैवी घटना आहे. वेळेत रुग्णवाहिका मिळाली असती तर हा जीव वाचू शकला असता,” असे त्यांनी सांगितले.

पोलिसांनी या प्रकरणाची नोंद घेतली असून, मृत्यूचे नेमके कारण शवविच्छेदन अहवालानंतर स्पष्ट होईल. दरम्यान, ही घटना आमदार निवासातील सुविधांच्या कमतरतेवर प्रकाश टाकते. यापूर्वीही येथील लिफ्ट बंद पडणे, छत कोसळणे अशा घटना घडल्या आहेत. आता या मृत्यूमुळे प्रशासनावर दबाव वाढला आहे.

कुणाल कामराच्या अडचणीत आणखी वाढ; मुंबई पोलिसांची तिसरी नोटीस धडकली

संबंधित बातम्या